كلمنى…شكرا

زمان كانت الناس فى الأعياد تتصل ببعضها وتزور بعضها ويقعدوا يعملوا

كحك العيد مع بعض وكان فى جو اللمه والأصحاب والجيران وليله العيد

ديه كان بيبقى ليها شكل تانى،بتكون يوم مختلف عن بقيه الأيام

بيبقى الناس كلها بتزور بعضها وتهنى بعضها ان خلاص العيد بكره

وكنا بنقعد نستنى المفتى يطلع بعد صلاه العشاء على القناه الأولى المصريه

وكلنا لهفه نعرف العيد امتى،ونفضل نتراهن بهزار مع صحابنا وقرايبنا

ان العيد هيبقى بكره وهم يقولوا لا بعد بكره،وكان احساس ان مصر كلها

قاعده تستنى زينا احنا وجيراننا قدام التليفزيون فى نفس اللحظه كان احساس حلو

أوى

تعالوا شوفوا بقى العيد دلوقتى

ليله العيد زيها زى أى يوم مفيش أى فرق والعيد بنبقى عارفين قبله بكتير هو هيبقى امتى وباليوم كمان

ولحظه مبنعرف ان العيد بكره عادى لا بنفرح ولا بنستغرب مهو احنا عارفين من زمان

وأغلب يوم ليله العيد بيبقى بنستقبل رسايل الموبيل من جيراننا وأصحابنا واحنا كمان بنفضل نبعتلهم رسايل العيد

وحتى التليفونات ليله العيد بعد ما كانت ما تبطلش رن بقوا عباره عن تليفونين أو تلاته من أقاربنا وخلاص على كده

والزيارات بتاعه زمان انتهت وكل حاجه حلوه مبقاش ليها طعم

هو ابن الأيه الموبيل ده السبب فى كل المصايب دى وقال ايه



Nokia connecting people

قولوا Nokia distancing people

وشركه موبينيل تقولك اتكلم من القلب

قولوا ابعت رساله من القلب طيب ياريت يتكلموا مكنش ده بقى حالنا

وشركه فودافون تقولك عيش اللحظه

محنا بنعيشها واحنا بنتفرج عالرساله المعفنه أم تلاتين قرش لا والناس تبعتها

المزيد

بصراحة يا عم محمود معاك حق

هو ده محمود اللى انا عارفه
طب كويس فكرتنى يا حودا نسيت ابعتلك كلمنى شكرا ماانت عارف اخوك مابيحطش رصيد

لا ياجماعه اما عرض1000 رساله ينزل هبقي اقول لكم علشان متتحوجوش لكلمني شكرا