انا مش معايا فلوس

مش معايه فلوس..!!


فى إحدى البيوت التى تعيش فيها أسرة صغيرة مكونة من خمس أفراد،،،
حصل موقف بيحصل على طول بس الخيال أخدنى شوية،
والموقف إتطوّر........ انا هسيب بطل القصة هو اللى يحكيها يالا بينا.



--------------------------------------------------------------------------------


أنا إسمى "بيبو" وإسمى الحقيقى محدش يعرفه بس هقوله لكم "بقلظ".
عايش فى بيتنا ،مع أبويا وأمى وأختى الكبيرة "مزيكا" ،وأخويا الصغير آخر العنقود "حماصة ".
والقصة بدايتها كانت من قبل الإمتحانات...

يااااااااااه فاضل على الإمتحان عشر أيام ، على كده أنا لازم أقعد أذاكر.....أذاكر؟! أذاكر منين أنا معيش حاجه أذاكر منها ،يبقى لازم أنزل الكلية و أشترى ورق الكورسات ، لكن أنزل إزاى وورق إيه اللى أجيبه وأنا معيش غير تلاتة جنيه وخمسه وسبعين قرش ، يبقى لازم آخد من أبويا ..بس ده أنا لسه منفّضه إمبارح وقلتله برضه عايز أجيب ورق كده مش هيصدقنى ....امّا أروح وأجرّب يمكن يكون نسى ،

[أخدت طقيّة كنت طابقها من واحد صاحبى من أيام إعدادى_ هيه مقطوعة بس مش باينه_ كأنها هدية ورحتله وهو بيتفرج ع التيليفزيون على (قناة ؟؟؟؟) ]

- بابا بابا .....

[مش بيرد عليا ليه ، أرجع ولا أنادى تانى ..مممممم ..يااارب ]

- بابا بابا.....

- إإإيه يازفت ..

- صباح الفل يا غالى أنا قلت أصبح عليك قبل ما انزل .

- ماشى ...يالا مع السلامة ونوّر كده من قدام التليفزيون

- حاضر .. شفت أنا جبتلك إيه طقيّة هتعجبك أوى .

- يا ما جاب الغراب... يالا روح شوف مصلحتك بقى .

[ ده شكله قرفان ومخنوق ولو قلتله عايز فلوس ممكن يرمينى من البلكون ة ، أنا هقعد أتكلم معاه يمكن يهدى شوية وبعدين اطلب منه فلوس..ربنا يستر ]

- مش أنا إمبارح قابلت عم "بورى" بتاع السردين و وقالى سلملى على أبوك.

رد عليا بزعيق...

- جتك نيلة أنت وهوه ع الصبح ,, الجدع ده أنا مش بحبه ما تجبليش سيرته تانى .

- ولا أنا ..ده أنا حتى كل ما أشوفه أمشى من شارع تانى .

[ فضلت ساكت شوية وبعدين قلتله ....]

- بابا .. هو فين شارع "روّحنى أوام روّحنى" ده؟

- معرفش ...

- متعرفش إزاى إنت مش المفروض مولود هنا و عارف كل الأفئدة ؟..

[ما رد عليا برضه ..أنا هقولو بقى وأسيبها على ربنا ]

- بابا ..أنا عايز فــ.............

[ قطع كلامى وصرخ فى وشّى وقال...]

- فلوس !! فلوس إيه إنت مش بتشبع فلوس ، كل يوم إنت وأمك ,ما ترحمونى بقى حرام عليكو جبتولى الضغط والسكر والمرارة , أروح منكو فين ...

- خلاص خلاص يا بابا أنا ما كنت هقول فلوس أنا كنت هقول أ أ هقول.. عايز فارة عشان أصلح الباب ده ,حضرتك عارفنى مش بحب أشوف حاجة بايظة وأسيبها
كده ..سلامو عليكو..أ أ أ بابا ممكن الطقيّة عشان دى مش بتاعتى .

[ بعد ما أبويا زعقلى ورمى الطقيّة فى وشّى ..رحت أشوف أمى يمكن تدينى حاجه ، و لقيتها فى المطبخ بتعيط...جريت عليها ]

- مالك يا ماما فى إيه ؟؟

- البصل يبنى بيحرق أوى

- فجعتينى ... ده أنا إفتكرت فى حد مات وهنورث ،أنزل أجيب لحضرتك عيش عشان الغدا .

- انا صحيتك الصبح , سيبتنى ونمت وخليت أختك تنزل تجيب .

- مممم...طيب أنزلّك الزبالة؟.

- اختك خدتها معاها وهية نازلة تجيب العيش,إنت مش لاقى حاجة تعملها ولا إيه ؟.

- لا ده أنا حتى مش فاضى خالص بس قلت أشوف أمى حبيبتى عايزة حاجة ولا ....

- آه . عايزاك تغسلى السجادة بتاعة الصالة .

-بس كده ..ده حضرتك تشاورى بس وتلاقينى بين إيديك.

[رحت جبت السجادة على كتفى ورجعت لها تانى ..]

- ماما أنا عايز فلوس أشترى ورق.

- منين ؟؟؟ ماأنت شايف أبوك ,كل ما حد يقولو على فلوس يزعق ويتعصب ,دهى حتى الفلوس اللى كنت شايلاهم عشان التنجيد بتاع أختك إتصرفوا ع البيت الشهر ده..

..... تررررررا ا ا ا ا ا ا ك [ ده صوت السجادة لما وقعت على الأرض ..أقصد لما انا رميتها على الأرض ]

- إيه ده إنت هتغسل السجادة هن ا؟؟.

- لا هنا ولا هناك , إبقى خلّى بنتك تغسلها بعد ما تجيب العيش بكرة .



طيب هعمل إيه دلوقتى , الإمتحانات قربت وعايز أذاكر ومفيش ورق أذاكر من ه.

آآآآآآآآه مفيش غيرها أختى هو أنا على طول قرفها فى عيشيتها , بس هي طيّبة قلبها كبير


بت يا مزيكا إنت يا بت ...

[ كانت واقفة قدام المرآه بتسرح شعرها ..]

- الله إيه الحلاوة دى.. ما شاء الله اللهم,, صلى ع النبى,,لا قوة إلا بالله ...قمر...وإيه الشعر الناعم اللى بيلمع ده وإيه .....

- معيش فلوس يا بقلظ..

[ إيه البواخة دى .. الحوار ده شكله إتقفش ومش هعرف أبلفها تانى ..]

- فلوس إيه ؟..انا مش عايز فلوس ..أنا ا ا.. أ..أ.أنا كنت جاى آخد المشط عشان أسرّح عشان نازل.

- إنت مش شايفنى بسرّح بيه.

- بتسرّحى بيه إيه ؟؟..شوية الكونافة اللى فى راسك دول ..بقى هو ده شعر أصلاً عشان يتسرّح ..


هى الناس دى بتعاملنى كده ليه ؟؟...طيب أعمل إيه دلوقتى ..أشحت ؟ لا الناس هتحس إنى كذاب وبعدين أنا بتكسف .....طيب اسرق ؟ برضه لأ...

الناس ما بتصدق تشوف حرامى عشان يعملو فيه اللى مش بيقدروا يعملوه فى الظباط.

وقعدت أفكر أفكر لغاية ما لقيت أخويا الصغير "حماصة" بيلعب وفى إيده عشرة جنيه, قمت بسرعة وناديت عليه


- حبت الفلوس دى منين يالا , سرقتهم ياد ولا كنت بتشحت ؟؟

- لا والله يا أبيه ده عمو " جلدة " عطاهانى وقالى روح إشترى حاجه حلوة .

- يا خبرك إسود وخدتهم من ه ؟..هات الفلوس دى وحسّك عينك تاخد حاجة من حد بعد كده , لو عايز فلوس خد من بابا أو ماما او أبيه , هو إحنا حرمينك من حاجه.يا للا إتفضل إمشى من هنا .


الحمد لله ...عشرة جنيه أهيه ,أحمدك يارب ..

ونزلت جبت ورق لإحدى المواد لغاية ما تفرج...


تررررررررررن ترررررررررن ...تليفون البيت رن عارفين طلع مين ؟؟؟ مستحيل ... انا مش مصدق مناخيرى... ده برنامج المفتش كرومبو, وقالولى إنى حليت
الحلقة بتاعة مين اللى وقّع "فايزة" وهيه بتغسل الحلل فى الترعة صح وكسبت , ..خــ..خــ..خمس..خمستلاف جنييييييييييييييييييييييييييه .
المهم رحت أخدت الخمس بواكى ورجعت البيت لقيت أبويا وأمى وأخواتى مستنينى ، ما هو طبعا خبر زى ده ما يستخباش خالص ،ده أنا إسمى طلع فى التليفزيون.


عدّيت من جنب أبويا من غير حتى ما اقول السلامو عليكو ,


فقالى وهو مبتسم ..

- إزيك يا بيبو يبنى عامل إيه فى مذاكرتك؟ يالا عايزك تتجدعن كده فى مذاكرتك وتتخرج عشان تشتغل فى شركة نضيفة.

- قول يارب..

- يا رب ..بقولك يا بيبو , ما تدينى خمسين جنيه لغاية ما أفك.

- تفك ؟ يعنى معاك فلوس اهو..

- لالا دى بتاعة عمك "بورى" حبيبى بتاع السردين كنت رايح أجيبلك منه عشان عارف إنك بتحب السردين.

- آ آ آ آه ..لا يا بابا ما تلقيش ..وبعدين سيبنى بقى أروح أذاكر..

شوية وأنا قاعد أذاكر لقيت أمى جاية ومعاها عصيرجوافة ..

- ربنا معاك يبنى خد إشرب ده عشان تعرف تركّز.

- شكراً يامّا .

-أنا النهارده جبتلك الفسيخ اللى إنت بتحبه .إيه رأيك ؟؟.

- لا أنا خلاص بقيت مش بحب الفسيخ .

- خلاص يا حبيبى أرميه لو مش عاجبك..بقولك يبنى ما تدينى ميتين جنيه أنزل أشترى جزمة وشنطة

- ما أنت لسه جايبة واحدة ولا هية فشخرة وخلاص وبعدين ده بدل ما تحوشى عشان تنجيد بنتك

- لا يا أخويا فلوس التنجيد كاملة زى ما هيه

- طيب يامّا بعدين نبقى نشوف الموضوع ده ...

شوية كمان وأختى جت

- بيبو... أنا روقتلك سريرك ورتبتلك كتبك وغسلتلك الشراب اللى كان مرمى ورا الدولاب ،،،انا نازلة رايحه للخياطة مش عايز حاجه؟.

- لا شكراً..

- طيب ممكن تدينى ميت جنيه عشان لو الفلوس اللى معايا ما كمّلت

- لا إن شاء الله الفلوس هتكمّل ولو ما كمّلت إبقى إديهم لها بعدين.

وطبعا لازم حماصة يجى برضه


- أبيه أبيه ...أنا عايز فلوس .

- فلوس إيه ياد ...إخلع من هنا , مفيش فلوس

- مش إنت قولتلى لما تعوز فلوس إبقى خد منى وما تاخدش من أى حد

- لا يا فالح وقولتلك كمان خد من أبوك أو أمك

- ما انا قولتلهم وقالولى آخد منك .

- آه هيه بقت كده ..روح لعمك "جلده" وقولو إن العشرة جنيه ضاعت ,وهو هيديلك واحدة تانية.



يا ســــاتر..إيه ده هيه الناس دى مش بتشبع فلوس ..
المهم بقى أنا عايز أنزل أشترى تاب لوب و كميرا ديجيتال و ساعة فيها تليفزيون و....بس هى كده الفلوس هتكفّى؟؟
أنا بقول أعدّ الفلوس الأول , الفلوس... فين الفلوس ...الفلوس فين الفلوس ضاعت. .

إلــــــــــحـــــــقـــــــــــو و و و و و و نـــــــــــــــــــــا ا ا ا ا ا ا ا ا ا ا اى
المصدر : http://100fm6.com/vb/showthread.php?t=40170 - 100fm6.com

جميلة جدا جدا

جامدة يا حودا
اصلى الواد ده
وادى جزاة اللى مايسمعش كلمة بابا يقولها

جميله جدا

جميله اوووووووووووووي