مصر اللي مخدناهاش في المدرسة !!!!!!!!!!!!!!!!!!!!!!!!!!!!!!!!!!!!!!!!!!!!!!!!

مصر اللى ماخدنهاش فى المدرسة

كتب على سلامة

١٩/ ٩/ ٢٠١٠

إحنا بلد
حبيبك يبلعلك الزلط..
والوزير يقول بيانات غلط..
والمسؤول يصدق
والميه تكدب الغطاس
واحنا بلد..
كل ما تتزحم الشوارع
تختفى الناس..
واحنا بلد العلم ف الراس
والامتحان من كتاب الوزارة
والإجابة من الكتاب الخارجى
والنتيجة ارمى حمولك على الله
واحنا بلد
من سبع تلاف سنة بيقول آه..
وفكرينه بيهزر
واحنا بلد لا بقى قادر يضحك
ولا عارف يكشر..
واحنا بلد
يحفظ أغانى العشق ع الكورنيش..
وينساها ف طابور العيش..
يتجوز ع الرصيف
ويطلق لما يلاقى شقة..
واحنا بلد
الفهلوة والجدعنة
وإدى زوبة زقة..
واحنا بلد
اتعود يقول نعم
لحد ما نسى كلمة لأه..
واحنا بلد بيلعب كتير ف الساعة
لحد ما باظت والوقت ضاع..
واحنا بلد يبكى يوم الفرح
ويغنى ف لحظة الوداع..
واحنا بلد
كل اللى اتعلمه من كتب العربى
إن السين لها تلات سنان..
واحنا بلد بيشمر البنطلون
عشان يعدى الشارع الغرقان..
وبرضه بيتبل..
واحنا بلد بيحب يتوه
وملوش مزاج يلاقى حل..
ولو حصل وزهق ومل..
يخرج م البيت يقعد ع القهوة..
واحنا بلد كل ما يقع
يقول معلش أصلى لامؤخذاة
اتاخدت على سهوة..
واحنا بلد
كل اللى اتعلمه من كتب الحساب
إنه يشقلب السبعة تبقى تمانية..
وكل اللى اتعلمه من كتب الكيميا
إنه يحب واحدة..
ويتجوز واحدة تانية..
واحنا بلد
بينسى العمر كله
ويفتكر قبل ما يموت بكام ثانية..


مما راق لي